Bahan Sermon Khotbah Minggu, 26 Oktober 2014

Introitus : 

Tapi lebih asa si e, perayaken kami eme kap ndarami uga maka ngena ate-Na, subuk ibas rumah kami si ijendah tah pe ijah" (2 Korinti 5:9)

Ogen          : Masmur 1:1-6 (Responsoria)

Khotbah     : 1 Tesalonika 2:1-8

Tema          : “Biak Perberita si Meriah”

I.    Kata Perlebe

    Biak sibanci siertiken perbuatan, gerak-gerik, tindakan, cara menjalankan atau berbuat, enda banci jadi gambaren uga kita situhuna. Contohna adi kita erbahan tindakan kekerasan maka ikataken kita penjahat, adi kita erbahan cakap sila tuhu ikataken kita perbual,rsd.

    Biak perberita simeriah si jadi tema nta, mabai kita guna mbuka mata pusuhta gelah banci erbahan perbuatan, gerak-gerik, tindakan, cara menjalankan atau berbuat kai-kai saja pe tetap ncidahken berita simeriah.

II. Isi

   introitus : nina Paulus, merupakan sada sukacita adina enggo dung ikatenna nandangi daging kulana (tubuh manusiawinya). Ikatakenna maka daging kulana seri bagi tenda perkemahen/ ingan tading sementara she paksana reh daging kula e hancur/ mate.  Emaka ula kal mengandalken gegeh pribadi sabab kerinana e nandangi hancur. Tapi andalkenlah gegeh Dibata sibanci erbahanca kegeluhenta menang ras senang I jah (di surga).  Emaka sipenting ibas erberita simeriah emekap lakoken singena ateNa sanga kita ngeluh I doni enda she makana pagi ngena ateNa man banta guna tading I Surga.

Ogen : susunen Masmur sipemena enda eme:

•  ayat 1-3 nuriken tentang kalak benar ija kegeluhenna merenungken undang-undang Tuhan. Malem ate emekap sada ungkapan keriahen, pujin, pendilo ras pengarapen antara manusia ras Dibata. “Malem me ate” banci ialoken adi: 1. La megiken pedah kalak jahat (tidak berjalan menurut nasihat orang fasik). Orang fasik ialah orang yang melakukan perbuatan yang bertentangan dan melanggar perekutuan dan kesetiaan.  Kalak jahat/orang fasik sejajar e ras kalak perdosa / pencemooh. 2. Si la ngusih perbahanen kalak perdosa ertina la nggit meleset ibas kelepaken. 3. Si la erteman ras kalak megombang man Dibata. (band. Ay.1).  Tapi ibas ayat 2 lebih bersifat nuduhken kebenaren eme keriahen man  kalak si matuhi undang-undang Tuhan dingen ngukurisa suari ras berngi. Biasana keriahen e sada hal sinuduhken ketedehen ate nandangi sada-sada hal. Undang-undang Tuhan (Taurat) ertina pengajaren si iukuri suari ras berngi artinya terus menerus. Ayat 3 enda perlu si inget situasi iklim Palestina si melas ras kerah. Seri bagi batang kayu si turah itepi lau anak, ban isuan deherken lau maka pasti ia erbuah menurut musimna, bulungna pe la melus ertina tetap segar, janah ibas pendahinna pe lit keberhasilen. (ungkapan optimis).

• Ayat 4-5 nuriken tentang kalak jahat ras nasibna, ija kalak jahat labo banci menghasilkan buah melainkan melus me sabab seri ras segal (sekam, dedak, debu, jerami). Eme gambaren kegeluhen si kosong ras la bernilai, si bakal iembusken angin/ I ukum Dibata.

• Ayat 6, nuriken dasar teologis sebagai kesimpulan kerna perbedaan simendasar ibas dua dalan kegeluhen.kalak bujur / Buah si tetap lalap ras secara teratur I hasilken kalak singukuri undang-undang Tuhan suari ras berngi. Sebalikna kalak jahat nggeluh tanpa Dibata dengan sendirina mengalami kebinasaan.

          Emaka ibas erberita simeriah, harus lit bas kita kemalemen ate situhu-tuhu, si la gampang diombang-ambingken kalak jahat, tapi tetap paguh ibas mematuhi undang-undang Tuhan janah terus-menerus ngukurisa, gelah kita banci jadi kalak benar si tetap itegu-tegu dingen ikawali Tuhan.

Khotbah : Sanga Paulus tading I Tesalonika amin gia la ndekah tapi waktu sikentisik e ipakekenna guna erberita simeriah, janah ulihna mehuli reh teremna kalak si tek man Tuhan  Jesus. Eme sababna kalak jahudi ercian ate ngenehen Paulus, janah atena munuh Paulus. Eme dalan-dalanna Paulus lawes ku Atena. Amin gia ia tading I Atena tapi tangkelenna tetap nge man perpulungen Tesalonika, emaka I utusna temanna Timotius guna berkat ku Tesalonika guna ndatken informasi. Berita simehuli siibaba Timotius kerna perpulungen Tesalonika eme kap perpulungen e tetap tutus erkiniteken man Tuhan janah tetap nginget Paulus ras tetap paguh ibas ngalaken erbage-bage rintangan geluh.

Keberhasilen pelayanen Paulus banci siidah arah biak Paulus ibas erberita si Meriah. Paulus mempertahanken perbahanenna simehuli, ije me Paulus I fitnah imbang-imbangna maka kai si ibahan Paulus e labo tulus ibas erberita simeriah. Tapi Paulus menegaskan maka kai si ilakokenna e labo sia-sia. Paulus erberita erpalasken pengalaman kinitekenna ibas mengandalken Tuhan guna erberita. Penuh perjuangan Paulus erberita, igombang-gombangi kalak, I gelari sebagai penjahat “buronan” (sabab Paulus pernah ipenjara erkite-kiteken nehken Berita siMeriah) si secara manusia labo banci kalak merudu megiken pengajaran arah sekalak narapidana. Nehken berita si meriah labo nuriken penipuan tapi mutlak kebenaran Dibata, amin gia pemberitaan e la menyenangkan pusuh manusia labo dalih sabab perayaken Paulus emekap menyenangkan Dibata. Paulus selaku perberita (Pengkhotbah) la mencari situasi adem ayem, gelah ipujiken kalak, gelah ialoken kalak, ipetunggung kalak arah melasken kata-kata si la menyinggung amin gia e kelepaken. Adi kin hal sibagenda jadi ibas misi pelayanen maka lambat laun integritas gereja Kristus akan dirusak she maka lanai banci ipekena. Arah dampar sidebanna banci si idah cara Paulus ibas erberita simeriah eme ncidahken sada teladan rohani, bagi sekalak nande nandangi anakna. Sikap nande si lemah lembut ras njagai, dem alu pengorbanen tetap berusaha guna ngasuhi, ras mereken keperlun rohani, mereken sepenuhna waktuna guna anak (perpulungen). Ertina labo saja terjeng erberita saja tapi mereken geluhna, waktuna total guna pelayanen/ labo saja melasken kekelengen tapi pe pelaku-pelaku kekelengen. Kerina e banci ilakoken Paulus ras teman-temanna erkiteken lit keleng ate Kristus ibas ia.

III.   Aplikasi

        Perberita si meriah labo saja kalak silit jabaten gereja ibas ia. Tapi pe kerina kalak si tek man Kristus. Emaka perlu kal ngge sipeturah janah sipebelin biak perberita si mehuli ibas geluhta. Erberita simeriah labo menonjolken gegehta tapi gegeh Dibata, labo banci munafik/ la berpihak nandangi si salah, ula mencari keuntungen ibas pelayanen sabab erberita simeriah labo saja arah pengerana tapi pe ketutusenta nehken kegeluhen erdalan sentudu ras sura-sura Tuhan. Kerina e banci si lakoken adi kita nggit ekolouthesan deute opisoo mou (yunani) ertina mengikut dan berjalan dibelakang Ku. Gelah sikap caranta ngusih, ula arah depan atau samping sabab mesera kita ngusih atau bahkan banci salah caranta ngusih Ia.

Pdt. Oktaria br Surbakti, STh.

GBKP Runggun Manuk Mulia

Bahan Sermon Khotbah Minggu, 19 Oktober 2014

 Introitus :
"Emaka berekenlah man sekalak-sekalak kai si patut ialokenna" (Roma 13:7a)
Ogen      : Jesaya 45:1-7 (Antiphonal)
Khotbah : Matius 22:15-22
Thema    : "Seh ken ras dalankenlah tanggung jawabndu!"
______________________________________________________

Bena Kata

     Ibas kamus bahasa Indonesia tanggung jawab eme keadaan wajib menanggung segalanya, banci pe ikataken maka tangnggung jawab eme kesadaren manusia kerna kai sibahanna dingen nggit ngaloken resikona. Arah tema si seh man banta "sehken ras dalankenlah tanggung jawabndu" mabai kita ngenen kerna uga kin kiniharusenta nggeluh selaku anak-anak Dibata i tengah doni enda.

Isi

     Benaken ibas matius 21:28-22:14 Jesus mpersingeti tokoh-tokoh Jahudi alu make piga-piga perumpamaan, tapi persinget-persinget e labo erbahansa kalak enda robah. Sebalikna, lalap idaramina dalan guna encubai Jesus (ay. 15). Kalak Parisi erusaha ndarami teman arih guna banci nidingi Jesus alu penungkunen si isehken Kalak Parisi guna menjebak Jesus emekap kerna nggalari pajak man pemerentahen Roma (ay. 17).  

    Ibas paksa e kalak Jahudi lit iteruh kekuasaan Kaisar Romawi, Kalak Jahudi wajib nggalar pajak man Kaisar. lit piga-piga golongen si menolak kewajiban nggalar pajak e, erkiteken pengakapna adi nggalar pajak berarti lanai patuh man Dibat, sebab Dibata ngenca Raja situhu-tuhu. Situasi sibagenda me si imanfaatken Kalak Parisi, segelah di kune "bujur nge nggalar pajak" nina Jesus, tentu segat me ate kalak Jahudi nandangi Jesus. Janah di kune "labo payo nggalar pajak" nina Jesus, tentu golongen parte Herodes labo senang, janah ikatakenna me Jesus pemberontak. Jawapen Jesus tentu mengandung resiko tinggi ibas dahin pelayanen-Na.

     Jesus meteh kai si lit ibas ukur kalak Parisi, emaka ikatakenna "O kalak pekulah-kulah! engkai maka icubaindu Aku? (ayat 18), artina Jesus nandai manusia ras ngidah seh ku bas ukurna lebih asa si iturikenna.

    Ibereken Jesus jawaben si erbahanca jengang kalak si nungkun Ia (ayat 19-22), "bereken man pemerentah kai si patut ibereken man bana, janah berekenlah man Dibata kai si patut sibereken man Dibata" Jabapen Jesus nuduhken uga kin sikap sipayo ibas kegeluhen kalak si tek. Sabap, selaku kalak si tek, lit 2 kewarganegaraanta, eme selaku warga Negara Indonesia ras Warga Kinirajan Dibata. 

  Selaku warga negara Indonesia, tanggung jabapta eme mpekena-kena negara arah mereken kewajiben janah mehamat nandangi pemerentahta, sebab kita kerina termasuk pemerintah banci ipake Dibata guna nehken sura-sura-Na. Enda banci sikaitkan ras ogenta, ija Dibata make Raja Kores guna mpekena-kena bangsa-Na. Bagepe selaku warga Kinirajan Dibata, sisehken dingen sidalanken tanggung jabapta arah nuduhken biak kegeluhen si mehuli sentudu ras peraten-Na ibas kegeluhenta si tep-tep wari. 

Pengkenaina 

     Sekalak Presiden Amerika Serikat, John F. Keneddy ngatakenca : "ula sungkunndu kai si banci ilakoken negara bandu, tapi sungkunlah kai si banci ilakokenndu guna negarandu" Ngerana kita kerna tanggung jabap berarti ngerana kerna "kai si harus silakoken" labo "kai si harus sialoken". Adi siperdiateken ibas negaranta, paksa genduari melala situasi si la bagi ukurta, tapi ibas situasi e, tetap nge harus sisehken tanggung jabapta guna mpehuli situasi geluhta, bagi nina ibas Jeremia 29:7 "Erdahinlah guna kiniulin kuta-kuta ku ja kam enggo kubuang jadi tabanen". Berarti tanggung jabapta emekap erdahin ras ertoto guna kiniulin kegeluhen kuja kita enggo itempatken Dibata, subuk ibas jabu, perpulungen, gereja, masyarakat bagepe pemerintahen.

      Selaku warga Kinirajan Dibata, anak-anak Dibata, tanggung jabapta emekap ngendesken daging kulanta ras dirita jadi persembahen singgeluh man Dibata (bdk. Roma 12:2). Kita sigel-gel nggeluh ibas gelap enggo ibaba-Na ku bas terang, kita sigel-gel mate erkiteken dosa enggo iselamatken-Na alu kuasa-Na. Emaka perlu kal kita nggeluh nuduhken biak-biak simehuli sebage pengataken bujurta man Dibata.   

Pdt. Ribka br Tarigan

GBKP Runggun Salit