Bahan Sermon Khotbah Minggu 5 Oktober 2014

Pdt. Klara br Tarigan

Introitus     : 

“Engkai maka la kami isampatiNdu? Engkai maka ipelepasNdu saja kami?” 

(Masmur 74:11)

Ogen          : Pilipi 3:4b-14 (Tunggal)

Khotbah      : Jesaya 5:1-7

Tema          : “Meramis Dingen Entebulah Buah Perbahanenndu”

I.                  Bena Kata

Ibas kegeluhen abad 21 enda melala sijumpai erbage-bage persoalen sisange labo wajar. Si harusna la terjadi, terjadi gundari, janah tingkah laku manusia pe reh warina reh serbutna. Manusia jadi pemangsa nandangi tinepa sideban. La ngenca e ibas persoalan keagamaan pe, pemuka agama beralih agama (perkembangan ISIS ras gereja setan) si perlu ikaji ulang kerna doktrin-doktrin agama. Selaku kalak Kristen harus mampu tampil beda ras doni egia uga banci siban adi pendeta, penetua pemuka agama la ngasup pertahanken buah kinitekenna e tetap meramis dingen entebu nanamna. Emaka ibas paksa e kita iperlengkapi uga gelah ngasup tetap meramis ras entebu.

II.               Isi

Arah bahan ogenta teridah maka Paulus merasa cemas kerna perkembangen kiniteken perpulungen Pilipi. Ija lit kalak sierkiniteken menentang pelayanenna. Emaka aminna pe ibas penjara, ia tetap mereken pengajaren man perpulungen guna mpeteguhi kinitekenna aminna pe lit perkembangen ibas darat nari. Emaka Paulus mereken penekanan maka adi ersura-sura ngikutken Kristus harus ngasup persilahang bana, labo erlumba-lumba “osasi” (onar sana sini) guna kepentingan pribadi. Perubahan doktrin, dogma terjadi guna nehi sura-sura daging saja (hedonisme semata). Emaka Paulus ngatakensa "aku ngelupaken kai si arah pudiku tetap erdalan nuju siarah lebeku".

Bage pe arah bahan khotbahta tangkas kal ituriken nabi Yesaya maka umat pilihan Tuhan seri bagi kebun anggur irawat alu kekelengen. Tapi uga ban adi batang anggur e mereken buah simacem ntah pe buah si la bagi sura-sura siempu juma e? Paksa si e terjadi krisis kenegaraan, sosial bage pe kebudayaan. Emaka ende-enden alegoris enda iogeken ibas paksa rani sebagai perenungen man bangsa Israel. Pemilik kebun anggur njaga anggurna alu kekelengen, ibahanna pagarna gelah ula banci icedaken rubia-rubia ntah pe musuh tapi buah anggur e mereken buah simacem erbahansa siempu juma la tanggung-tanggungina ncedakensa gelah sambari alu simbaru. Lanai ingetna uga susah ras cedana akapna pekena-kenasa selama enda     

III.           Pengkenaina

Adi siperdiateken kerna peken anggur enda ndai encidahken uga siempu peken anggur e ertanggungjabab ibas ngusahahisa erbanca buah anggur e jadi buah anggur sibermutu (soreq) tapi adi buah anggur e tetap macem maka pemilikna erbahan “reshuffle” perombaken total. Mbue kal kita kalak sierkiniteken terlena maka lagu langkah sitep-tep warina lanai berpengaruh kerna keselamaten sienggo ibereken Dibata arah Yesus Kristus. Akibatna manusia ngelupaken perbahanenna, sikap nggeluh bagin ibas tanggung jawab simerupaken buah kinitekenna.

Bicara aku ras kam batang anggur e, enggo nge mere buah anggur si mehulina bagi sini iarapken Tuhan siempuna peken anggue e? entahsa buah sihasilken e buah simacem sierbahansa kalak simansa ringut ayona nahanken macemna ntah lenga ka kita erbuah? Kekelengen Tuhan, lenga bo terlambat guna mpelimbaruisa. Tuhan ngarapken kita guna erbuahken buah simehuli dingen entebu ipan janah eme ketedehen kalak. Kita banci erbuahken buah sintebu sue ras pertobatenta. Kesuksesenta jadi anak-anak Dibata ibas ndatken hak waris Kinirajan Surga labo inen ibas darat saja tapi uga mehulina buah roh sini ihasilken kita. Tuhu adi kita nggeluh ibas Tuhan harusna kin buahta buah si mehuli meramis, tapi buah si meramis e labo macem. Janah perlu si inget maka enda kerina banci jadi adi kita tetap rembak ras nggeluh ras Tuhan.   

• Buah karakter : Reh dewasana kita ibas Kristus, karakterta reh dewasana sebab karakter e merupaken kualitas kegeluhenta.

• Buah jiwa : Pohon mangga pasti buahna manga. Kita sebagai anak-anka Dibata seharusna banci menghasilken anak-anak Dibata sideban.

• Buah Pelayanen : Potensi ras talenta sienggo ibereken Dibata sangat luar biasa. Emaka perlu siberdayaken potensita e ibas keluarga ras persekutuanta gelah reh mbuena kalak nandai Dibata. Enggo nge simaksimalken potensinta e?

Kebaktin Lapangan ras Sharing Guru PAUD se-Klasis Kabanjahe-Tigapanah

      

         Ibas wari Sabtu, tgl 31 Agustus 2014 si lewat GBKP Klasis Kabanjahe-Tigapanah ngadaken Kebaktin Lapangen ras Sharing bersama guru-guru PAUD si lit i Klasis Kabanjahe-Tigapanah. Kegiatan enda ilakoken i Pantai Sitopsi II, Tongging, Kab.Karo. Rombongen berkat erpagi-pagi jam 08.30 Kantor Klasis nari alu nangkih motor Murni bagepe kendaraan Klasis ras piga-piga kendaraan pribadi. Si ikut ibas kegiaten enda lit sekitar 14 PAUD alu masing-masing PAUD mengutus 1-3 kalak.

           Kebaktin enda ibabai langsung ketua Klasis Pdt. Dormanis Pandia. Ibas renungan Kata Dibata sini ibuat arah Matius 19:13-14, Pendeta mengajuk kerina guru-guru PAUD guna merenungken pelayanan pendidikan si enggo ilakoken sedekah enda. Aminna melala tantangen baik ibas pendirian PAUD ndube, secara organisasi, penghasilan guru, fasilitas bahkan mungkin tantangen enda rehna ibas kita "ajar-ajar Yesus" nari tapi ula sempat semangat pelayanan bagepe kekelengenta nandangi anak-anak sempat luntur, tapi tetap min kita jadi pengajar si mabai anak-anak si kitik enda bertumbuh ibas Tuhan bagepe terbangun biak-biak si mehuli ibas dirina. 

           Ibas perjumpaan enda pe ilakoken sharing kerna pengalaman masing-masing guru PAUD tiap-tiap Runggun. Sharing enda ifasilitasi Pt. Paten Kaban (Kabid Marturia), Dk. Florida br Karo (Kabid Diakonia), Pdt Junus Bangun (Kabid Koinonia) ras Pdt. Dormanis Pandia (Ketua Klasis).   Melala suka-duka si ituriken guru PAUD, mulai pengalamen kuga mendiriken PAUD ibas runggun bagepe erbage-bage tantangen si lit ibas pelayanan PAUD. Guru-guru PAUD pe ngataken bujur ibas iadakenna kegiaten enda bagepe dukungan si ibereken Klasis Kabanjahe-Tigapanah sedekah enda.

          Kenca dung man ciger, ilanjutken acara games ras acara landek man kerina si pulung ibas kegiaten enda. Kerina si pulung teramsuk personalia ras kerina BP Klasis ikut berpartisipasi ibas acara landek ras games enda, bahkan lit piga-piga si numbangken lagu. Selain guru-guru PAUD, ikut piga-piga Personalia (Pendeta) si ia pe selaku guru PAUD ibas runggun ingan pelayanenna bagepe si utusen ibas BP Runggun nari. Personalia si ikut ibas kegiaten enda eme : Pdt. Ribka br Tarigan, Pdt. Alpennius Surbakti, Pdt. Elba Pranata Barus, Pdt. Eliraninta br Sinulingga, Pdt. Klara Tarigan, ras Vic. Yohan Frananta Tarigan. Janah la ketadingen piga-piga BP Runggun si ikut ibas kegiaten enda. Ibas Games ras acara landek enda tuhu-tuhu meriah kal iakapna kerina, erkiteken games si irancang Pdt. Alpennius bagepe Pdt. Klara erbahanca mecek beltek kerina tawa. Akhir kata, Erpengarapen kita maka kebersamaan bagepe kiniersadan para pelayan PAUD enda semakin paguh ras ngasup tetap encidahken kekelengen nandangi kerina anak-anak Tuhan si ididikna (Vic. Yohan Frananta Tarigan).

Acara HUT Mamre Perp. Merek ku Pasir Putih

Ibas rangka mperingeti HUT Mamre sipe 19 ken, Mamre GBKP Perpulungen Merek ngelakoken PA Lapangen ku Pasir Putih / Samosir ibas tanggal 6 - 7 September 2014. Emaka ibas tanggal 6 jam 3 karaben berkat me kerina rombongen Mamre Merek enda i Puskesmas Merek nari menuju Pasir putih Samosir alu mbaba kerina perlengkapen  man la ketadingen ras Keyboardna. Kira-kira jam 7 berngi seh me ibas ingan  tujun, eme Pasir putih Village alu la kurang sada kai pe. Emaka kerina Mamre enda pe pekesahken entisik ibas ingan e, janahna rende-rende i iringi musik Keyboard. Jenari lit deba mis si nanggerken nakan, Lit si mpesikap perlengkapen man, lit ka si menghibur kerina si erkeras enda ndai alu  ngendeken ende-enda si meriah janahna landek.

Enca elah man, i lakoken me PA Mamre, Sebab bagi biasana pe Mamre GBKP Perpulungen Merek ngelakoken PA Mamre ibas wari Sabtu berngi. PA Mamre enda i babai Vic. Yohan Frananta Tarigan ( PKPW GBKP Rg Suka si peduaken ) ras Rian Barus ( Naras Pdt.Mery Beti Br Sembiring ). Ibas PA enda kerina Mamre i persingeti uga seharusna selaku anak-anak Dibata pentar ibas njaga kesehaten arah 5P ( Perpan, Pertunduh, Perminem, Pergeraken ras Perukuren ), Alu tetap erkemalangen man Dibata. Dung PA, i lakoken me pemilihen penyisipen Pengurus Mamre ( Bendahara ) erkite-kiteken Bendahara si gel-gel terpilih jadi pertua periode 2014-2019. Pemilihen Bendahara enda pe erdalan alu mehuli, janah si terpilih eme Bp.Levin Sidebang. Dung pemilihen bendahara Mamre, i terusken me ercakap-cakap kerna sura-sura Perpulungen Merek ibas mbangun gedung KA-KR si enggo i putusken piga-piga minggu si enggo lewat. Luar biasa perhatin Mamre Merek enda selaku Bapa nangdangi anak si kitik denga ( KA-KR ) seh maka ibas HUT Mamre si pe 19 tahunken enda, Ertekad ia kerina guna semaksimal mungkin nampati Pembangunen gedung KAKR enda, Subuk arah Dana, Waktu ras pe Pikiren. Ngenca kerina percakapen danci i lakoken alu mehuli, i terusken me ku acara hiburen rende janah landek. Kerina Mamre enda ncidahken kemampunna ibas rende ras landek, kepeken melala kel bakat siterpendam ibas Mamre Merek enda, khususna ibas rende ras landek. Kerina rende, landek janah tawa-tawa, seh maka enggo pe mbages berngi lanai tergejap.

Pepagina jam 8 erpagi-pagi kerina sarapen, dung sarapen i lakoken me Kebaktin Minggu si i babai Vic. Yohan Frananta Tarigan. Ibas Kebaktin Minggu enda sue ras tema ‘’ Kam enggo i pilih Dibata jadi si erjaga ‘’ ibas Khotbahna Vicaris enda pe mpersingeti kerina Mamre, Uga kin seharusna Mamre njagai kebadianna, njagai kegeluhenna, njagai dingen mabai kerina isi jabuna guna tetap erkemalangen man Dibata, Gelah arah kerina kegeluhen jabuna pe danci tetap terpuji termulia gelar Dibata. Dung Kebaktin Minggu, i terusken  me ku acara Permainen si i babai Rian Barus (naras Pdt.Mery). Ibas permainen sinibabai naras enda pe tuhu-tuhu maba keriahen man kerina Mamre enda. Kerina Mamre surak-surak dingen tawa-tawa ibas ngikuti permainen enda. Emaka ngenca dung kerina acara permainen ras pembagin hadiah, i terusken me ku acara bebas. Emaka kerina mamre ridi-ridi, lit ka si naik banana boad, kerina teridah keriahen ukurna. Ngenca dung man ciger, rende ras landek ka ulihi kerina Mamre enda ndai janahna surak ras tawa. Emaka jam 3 karaben berangkat me nadingken Pantai Pasir Putih guna mulih ku Merek alu dem keriahen ukur ras semangat si mbaru guna tetap jadi Mamre si erkemalangen man Dibata. Jam 6 karaben rombongen Mamre Merek seh me ibas Puskesmas Merek alu dem kejuah-juahen. SELAMAT ULANG TAHUN MAMRE GBKP PERPULUNGEN MEREK, TETAP SEMANGAT IBAS KERINA DAHIN-DAHIN PELAYANEN, BAGEPE IBAS NAMPATI PEMBANGUNEN GEDUNG KA-KR PERPULUNGEN MEREK, DIBATA SIMASU-MASU KAM KERINANA. ( Rian Barus / naras Pdt.Mery beti Br Sembiring )

BAHAN SERMON KHOTBAH MINGGU, 28 SEPTEMBER 2014

Pdt. Julianus Barus, STh

Introitus           : 

Ise megi katangKu enda dingen ngikutkenca, ia bali ras kalak pentar si majekken rumahna i babo batu (Matius 7:24)

Ogen                : Esekiel 18:1-4; 25-32 (Tunggal)

Khotbah           : Matius 21:23-32

Tema               : “Ueken ras dalanken perentah Jesus”

I.     Kata Perlebe

Selaku orang tua mekatep kel kita mabai ras ngajarken anakta kerna si mehuli. Tujun kita ngajarken e eme gelahna anak e pagi banci ngenanami kesenangen ras kedamen baik ibas pendahinna, pergaulenna bagepe jabuna. Keriahen orang tua si mbelinna nandangi anakna eme adi anak megiken ras ndalanken bagi si ikataken orang tuana.

Kekelengen orang tua si gejabken kita sekalak-sekalak belinen denga kekelengen Dibata nandangi kita manusia, emaka la kel ateNa kita ndatken hukumen erkiteken dosata si la ndalanken perentah Dibata. Orang tua mereken pengajaren man anakna, bagepe guna mpersingeti ia arah kesalahenna alu erbage-bage cara, terlebih Dibata melala kel cara ras alat sibanci ipakaiNa guna ngajari ras mpersingeti kita, adi sinen ibas bahan khotbahta enda teridah maka ipersingetina arah perumpamaan.  

II.  Isi

Arah ogenta Kitab Esekiel 18:1-4; 25-32 enda nuriken uga Bangsa Israel sangana lit bas pembuangen ku Babel, tupung si e raja si meminpin eme Nebukadnezar. Bangsa e ibuang erkiteken lanai megiken ras ndalanken perentah Dibata, teridah arah  penembahenna man dibata-dibata sideban, maka sempat pe Jerusalem igelari si la patuh “eme tandana memberontak man Dibata”, Jerusalem selaku diberu si perlua-lua “eme tandana bangsa e lanai njaga kebadianna terlebih kebadian Dibata” enda nuduhken uga kelekna dosa si ilakuken bangsa e (Esekiel 16). Emaka Dibata mereken ukumen guna jera “Bertobat” ibas dosa nari bagepe nggit ndalanken perentah Dibata, janah perlu sieteh maka enda me tanda keleng ate Dibata. Dibata la kel senang ngenen kalak perdosa mate (Esekiel 18:23 akapndu kin meriah Kuakap ngidah kalak jahat mate? Nina Tuhan si erdolat.Lang, madin Kuakap ngidah ia jera, gelah ia nggeluh).

Ibas ayat 2, 25. enda nuduhken makana ibas la ndalanken perentah Dibata lit ije enggo saling menyalahken (bnd Adam ras Hawa) ntah pe salah pengangkan, orang tua si man buah anggur si macem ikut ras anak-anak ngilu ipenna. Iakapna maka orang tua erbahan dosa ikut ras anak-anak pe kena hukumen Dibata, sekali jadi banci jadi banci sinen (Bil 14:18.......kesusuren si peteluken seh peempatken iukum Dibata erkiten salah orang tuana), tapi ibas si e kerina labo mutlak jadi adi ngelakoken si mehuli, nggeluh bujur ras ndalanken prentah Dibata (Bil 18:20, ise erdoas ia nge mate, sekalak anak labo labo ngenanami kiniseran erkiteken dosa bapana......), emaka ibas ayat 31-32 iajuk gelah olanai ngelakoken kejahaten, tapi jeralah gelah nggeluh. Kata “Nikham” ertina menyesal, “Sub” ertina berbalik arah duana enda nuduhken jera janah lanai ngulangi kesalahen si melibatken pikiren ras perasaan.

Ibas bahan Khotbahta Matius 21:23-32, Jesus ngajar ras mpeseh kata Dibata e make perumpamaan. Secara umum Jesus make perumpamaan gunana gelah kalak si nterem mesunah akapna ngertikenca. Tapi ope denga seh ku bahan khotbahta enda ayat perlebena lit ije penungkunen si bersifat mencurigai Jesus kuasa kai kin si pakeNa ibas erbahan tanda-tanda sengget/mujijat,  penungkunen enda rehna arah kalangen imam-imam ras peminpin-peminpin kalak Jahudi, emaka perumpamaan enda situhuna ate Jesus guna menyadarken kalak enda kerina. Sedekah enda i uekenna ras ialokenna kata Dibata tapi labo idalankenna.

Perumpamaan kerna dua kalak anak, sekalak isuruh bapana erdahin iuekenna tapi la idalankenna, sekalak nari la iuekenna  tapi idalankenna, arah perumpamaan enda isungkun Jesus kalak ndai apai nge akapndu si nehken sura-sura bapana, ijababna eme anak singuda (ayat 31), la isadarina kepeken maksud perumpamaan ras penungkunen Jesus e tujunna man bana, guna menyadarken imam ras peminpin e. Kata Jesus man kalak ndai leben nge pemungut cukai ras diberu si dahinna erlua-lua bengket ku kinirajan surga asa kam, engkai maka banci bage jadi? Erkiteken kalak pemungut cukai ras diberu si erlua-lua ndai kenca ibegina Kata Dibata arah pengajaren suruh-suruhen Dibata (Johanes Peridiken) ialokenna, iuekenna ras idalankenna ertina lit ibas ia pertobaten ras penyesalen, tapi imam ras peminpin ndai terjeng ueken ngenca tapi la idalankenna, labo teridah sikap ras perbahanenna si nuduhken kiniulin ras kebujuren, ayat 32 ......lalap la erkusur ukurndu dingen lalap kam la tek, enda banci jadi salah sadana eme bujur akapna bana.

Arah bahanta enda perlu si perdiateken eme selaku anak man orang tua ibas pengajaren ras perentahna si benarna eme ueken ras dalanken, terlebih kita selaku kalak si tek man Tuhan, ibas kerina perentah Dibata man banta ueken ras dalankenlah ibas geluhta, sebab ulihna eme kegeluhen ras keselamaten.

III.   Pengkenaina

1. Selaku anak-anak Dibata si kelengiNa, ula nai siban cara geluhta si la bagi sura-sura Dibata, sembahlah Dibata janah dalankenlah PerentahNa, ulihna eme kegeluhen ras keselamaten, adi la si dalanken ulihna eme kematen.

2. Selaku anak haruslah megiken ras ndalanken ajaren ras perentah orang tuana, enda nuduhken kehamaten ras menghormati orang tua. Tujunna eme kesenangen bas orang tua, kedamen bas anak (10 pedah Dibata si pe 5 ken)

3. Kalak si la ngueken ras ndalanken perentah Dibata, sifat si turah ibas ia salah sada eme menyalahken kalak sideban ras la lit ketenangen ibas ia.

4. Ibas kerina cara geluhta perlu kel lit bas kita pengoreksian diri, gelah alu bage si eteh maka kai si lakoken kita e bagi singena ate Tuhan ntah lang.

KORBAN CIKURAK

Cikurak (encakapken silatuhu/silalit bukti kerna kalak sideban/silaterpertanggungjawabken) ibas nai-nai nari seh asa genduari megati lenga bo terlepasken arah kegeluhenta (meriah siakap ncakapken kekurangen kalak sideban). Janah isepe adi ia icikurakken, lalit simerasa senang, janah banci mpeturah perubaten, perpecahen, latih rukur ras ukur megelut. adi kita ncakapeken kerna situhu, lit buktina bagepe banci sipertanggungjawabken kerna sicakapken kita e, ertina e labo cikurak, tapi berita.  

Enterem jelma cikurak situhuna erkiteken lit kesadaren ibas ia guna membangun nama baikna, alu mpermejin-mejin kalak sideban. Biasana adi kita i cikurakken, tentuna pasti bertentangen ras kepentingenta, eme sebabna maka teremen jelma merawa sehpe banci rubat adi ia icikurakken. Tapi cikurak enda “unik”, adi encakapken silabo tuhu (cikurak) enterem kalak banci tahan ndekah ngerana, tapi adi sibandingken encakapken kata tuhu (kebenaren) enterem nge jelma enda labo tertarik. Buktina simegiken kata Dibata ibas kebaktin PJJ, PA, Gereja, enterem denga nge labo reh ras lit ka nge piga-piga munduk-unduk sireh e.

Maka situhuna, adi lit jelma tertarik nandangi sila tuhu (ketidakbenaren), berarti lit silamehuli ibas perukurenna, sebabna adi mehuli perukurenna, labo ia nggit menikmati “fitnah” kerna kalak sideban. Emaka kita selaku kalak sierkiniteken man Tuhan Yesus harus kita menghindari “cikurak” ras adina kita i cikurakken, positiflah kita nanggapisa.

Sebabna adi lit sincikurakken kita berarti e tandana :

1.      Lit singinget bagepe simperdiateken kita.

2.      Ulin kualitas kegeluhenta asangken kegeluhenna.

3.      La ia ngasup bagi kita e (percian).

4.      Lit sura-surana guna menghambat pertumbuhen ras perkembangen kegeluhenta.

5.      La mehuli perukurenna, tujunna gelah kita megelut, mela ras latih ukurta.

Emaka kalak sicikurak eme ciri-ciri jelma sila mehuli. Ras perlu ka nge sieteh, adi kita si jadi korban cikurak, sijadikenlah e jadi penyemangat man banta, guna ngelawan cakap silatuhu e kerna kita alu mbuktiken arah perbahanenta. Sebabna, adi kita mereken “klarifikasi” arah cakap man kalak sideban, melala nge kalak labo tek. Janah jelma sincikurakken endape penting nge man banta, gelahna sieteh ise temanta situhuna ras ise temanta si menyamar/palsu. Maka adi kita icikurakken, pertahanken pendirinta ras kataken man Tuhan “sampati aku Tuhan gelah ngasup aku mperbue kiniulin guna ngelawan usaha kalak “memperburuk” kegeluhenku”. Intina ngelawan cikurak sipaling “ampuh” eme mperbue kiniulin arah perbahanen. Jadikenlah cikurak kalak e sebage pelajaren guna meningkatken kwalitas kegeluhenta, gelah semakin hati-hati kkita ibas pergaulen. Emaka silamehuli epe banci nge jadi kiniulin man banta adi simaknai alu positif bagepe nggit mengintrofeksi diri. Jadi, adi kita icikurakken, labo perlu sijumpai (rubati) sincikurakken kita e. sebabna labo perlu sibalas sijahat alu sijahat (1 Petrus 3:9). Inget!! Tuhan tetap natap kempak kalak bujur, janah tetap begikenNa pertotonna, tapi ilawanNa kalak sindalanken perbahanen sijahat (1 Petrus 3:12).

            Emaka man sipercikurak epe labo lit keuntungen ibas ia encikurakken kalak, sebabna arah ercikurak tujunna gelah ia ikataken lebih mehuli asangken kalak sideban. Kehormatenta entahpe nama baikta labo itentuken arah cakapta, tapi arah perbahanen nge. Emaka adi lit siakap berita silabo siakap tuhu, langsung saja sisungkun jelmana, enda megati sisungkun silameteh, eme sebabna suasana e semakin panas erkiteken erbelangna berita silapasti e.

Jadi adi lit sibegi kekurangen temanta, tugasta labo encakapkenca man kalak, sebab labo kari lit solusina. Tapi tugasta eme ndarami solusi gelah kekurangenna e banci min ipehulina. Janah adi lit siatena ercikurak ras kita, adi sieteh labo tuhu berita e, katakenlah  “labo tuhu”, ula kari enggo pe sieteh labo tuhu meriah ka siakap ngataken “ue” adi nggit kita ngataken “ue” nandangi silabo tuhu erdosa kita, sebabna kita e perbual (Bnd. Matius 5:37). Emaka ulanai kita cikurak sebabna cikurak eme dosa seri saja ras perbual. Janah adi la kita senang icikurakken, ula ka kita nggit ncikurakken kalak, sebabna nina Yesus ibas Matius 7:12a “Bahanlah man kalak sideban bagi ngena atendu ibahanna man bandu”. Bujur, Tuhan Yesus Simasu-masu (Pdt. Elieser T. Tambun, S.Th).