KORBAN CIKURAK

Cikurak (encakapken silatuhu/silalit bukti kerna kalak sideban/silaterpertanggungjawabken) ibas nai-nai nari seh asa genduari megati lenga bo terlepasken arah kegeluhenta (meriah siakap ncakapken kekurangen kalak sideban). Janah isepe adi ia icikurakken, lalit simerasa senang, janah banci mpeturah perubaten, perpecahen, latih rukur ras ukur megelut. adi kita ncakapeken kerna situhu, lit buktina bagepe banci sipertanggungjawabken kerna sicakapken kita e, ertina e labo cikurak, tapi berita.  

Enterem jelma cikurak situhuna erkiteken lit kesadaren ibas ia guna membangun nama baikna, alu mpermejin-mejin kalak sideban. Biasana adi kita i cikurakken, tentuna pasti bertentangen ras kepentingenta, eme sebabna maka teremen jelma merawa sehpe banci rubat adi ia icikurakken. Tapi cikurak enda “unik”, adi encakapken silabo tuhu (cikurak) enterem kalak banci tahan ndekah ngerana, tapi adi sibandingken encakapken kata tuhu (kebenaren) enterem nge jelma enda labo tertarik. Buktina simegiken kata Dibata ibas kebaktin PJJ, PA, Gereja, enterem denga nge labo reh ras lit ka nge piga-piga munduk-unduk sireh e.

Maka situhuna, adi lit jelma tertarik nandangi sila tuhu (ketidakbenaren), berarti lit silamehuli ibas perukurenna, sebabna adi mehuli perukurenna, labo ia nggit menikmati “fitnah” kerna kalak sideban. Emaka kita selaku kalak sierkiniteken man Tuhan Yesus harus kita menghindari “cikurak” ras adina kita i cikurakken, positiflah kita nanggapisa.

Sebabna adi lit sincikurakken kita berarti e tandana :

1.      Lit singinget bagepe simperdiateken kita.

2.      Ulin kualitas kegeluhenta asangken kegeluhenna.

3.      La ia ngasup bagi kita e (percian).

4.      Lit sura-surana guna menghambat pertumbuhen ras perkembangen kegeluhenta.

5.      La mehuli perukurenna, tujunna gelah kita megelut, mela ras latih ukurta.

Emaka kalak sicikurak eme ciri-ciri jelma sila mehuli. Ras perlu ka nge sieteh, adi kita si jadi korban cikurak, sijadikenlah e jadi penyemangat man banta, guna ngelawan cakap silatuhu e kerna kita alu mbuktiken arah perbahanenta. Sebabna, adi kita mereken “klarifikasi” arah cakap man kalak sideban, melala nge kalak labo tek. Janah jelma sincikurakken endape penting nge man banta, gelahna sieteh ise temanta situhuna ras ise temanta si menyamar/palsu. Maka adi kita icikurakken, pertahanken pendirinta ras kataken man Tuhan “sampati aku Tuhan gelah ngasup aku mperbue kiniulin guna ngelawan usaha kalak “memperburuk” kegeluhenku”. Intina ngelawan cikurak sipaling “ampuh” eme mperbue kiniulin arah perbahanen. Jadikenlah cikurak kalak e sebage pelajaren guna meningkatken kwalitas kegeluhenta, gelah semakin hati-hati kkita ibas pergaulen. Emaka silamehuli epe banci nge jadi kiniulin man banta adi simaknai alu positif bagepe nggit mengintrofeksi diri. Jadi, adi kita icikurakken, labo perlu sijumpai (rubati) sincikurakken kita e. sebabna labo perlu sibalas sijahat alu sijahat (1 Petrus 3:9). Inget!! Tuhan tetap natap kempak kalak bujur, janah tetap begikenNa pertotonna, tapi ilawanNa kalak sindalanken perbahanen sijahat (1 Petrus 3:12).

            Emaka man sipercikurak epe labo lit keuntungen ibas ia encikurakken kalak, sebabna arah ercikurak tujunna gelah ia ikataken lebih mehuli asangken kalak sideban. Kehormatenta entahpe nama baikta labo itentuken arah cakapta, tapi arah perbahanen nge. Emaka adi lit siakap berita silabo siakap tuhu, langsung saja sisungkun jelmana, enda megati sisungkun silameteh, eme sebabna suasana e semakin panas erkiteken erbelangna berita silapasti e.

Jadi adi lit sibegi kekurangen temanta, tugasta labo encakapkenca man kalak, sebab labo kari lit solusina. Tapi tugasta eme ndarami solusi gelah kekurangenna e banci min ipehulina. Janah adi lit siatena ercikurak ras kita, adi sieteh labo tuhu berita e, katakenlah  “labo tuhu”, ula kari enggo pe sieteh labo tuhu meriah ka siakap ngataken “ue” adi nggit kita ngataken “ue” nandangi silabo tuhu erdosa kita, sebabna kita e perbual (Bnd. Matius 5:37). Emaka ulanai kita cikurak sebabna cikurak eme dosa seri saja ras perbual. Janah adi la kita senang icikurakken, ula ka kita nggit ncikurakken kalak, sebabna nina Yesus ibas Matius 7:12a “Bahanlah man kalak sideban bagi ngena atendu ibahanna man bandu”. Bujur, Tuhan Yesus Simasu-masu (Pdt. Elieser T. Tambun, S.Th).