Panen Perdana Juma Rimo GBKP Seribujandi

               Ibas tanggal 8 Agustus 2014 si lewat, GBKP Runggun Seribujandi Klasis Kabanjahe-Tigapanah ngelakoken Panen Perdana Juma Rimo Runggun Seribujandi. Adi sinen sejarahna, Juma Runggun Seribujandi enda itukur bertepaten ras Tahun Kemandirian Dana GBKP.  Panen Perdana enda ilakoken Runggun Seribujandi, Moderamen GBKP, ras BP Klasis Kabanjahe-Tigapanah. Mewakili Moderamen GBKP eme Bendahara Umum Moderamen Dk. Kristiani br Ginting. Mewakili BP Klasis Kabanjahe-Tigapanah eme Ketua Klasis Pdt. Dormanis Pandia ras Sekretaris Klasis Pdt. Julianus Barus, janah Pendeta enda ka me siikut menjadi penggagas nukur ras nuan juma Rimo enda sanga Ia melayani i Runggun Seribujandi denga. Ibas GBKP Runggun Seribujandi nari siikut ibas rani perdana eme kerina Pertua/Diaken si ikut turun langsung jadi aron si ngerani rimo, bagepe Pendeta Runggun Seribujandi Pdt. Elianita br Keliat ras Naras pendetata enda si ikut ngerawat Rimo Runggun Seribujandi enda.

Panen Perdana enda ibenaken alu Kebaktin sini ibabai Bendahara Moderamen Dk Kristiani br Ginting. Ibas renungen Kata Dibata, Dk. Kristiani Ginting ngogeken Pengerana 11:1-5. Arah kata Dibata enda Bendahara Moderamenta enda menekanken maka pentingna memaknai kerina paksa-paksa ibas kegeluhenta alu tetap ngataken bujur man Dibata ras tetap erkemalangen man baNa. Bagepe itekankenna  man Runggun Seribujandi gelah tuhu-tuhu mangelola sumber daya si lit enda (juma ras rimo) alu mehuli guna pelayanen,  janah banci lah e memupuk kiniersadan perpulungen la saja ibas paksa gundari tapi ibas generasi seterusna. Kegiatan Panen Perdana enda iakhiri alu man ciger bersama. Lit pe jumlaH hasil rani rimo enda siterperani eme + 1,4 ton. Ibas kais i enggo ilakoken GBKP Runggun Seribujandi enda banci lah min enda jadi usihen nandangi runggun-runggun (Pdt. Elianita br Keliat ras Vic. Yohan Frananta Tarigan).