PENGENDESEN PKPW KU GBKP RUNGGUN KUTAKEPAR RAS ACARA LEPAS SAMBUT PKPW GBKP RUNGGUN MULARAYAT

                 

Kenca penantin 6 tahun dekahna sejak GBKP Runggun Kutakepar enggo jadi Runggun, akhirna ibas tgl. 20 Agustus 2014, ilakoken me pengendesen Personalia si melayani i GBKP Runggun Kutakepar, sebab selama enda lenga pernah lit PKPW si melayani ibas Runggun enda. Sue ras surat keputusen Moderamen GBKP, maka enggo itempatkan me Vic. Pagit Isauara br Tarigan ku GBKP Runggun Kutakepar, emaka ilakoken me Acara pengendesenna sini ilakoken BP Klasis Kabanjahe-Tigapanah  sekaligus mewakili Moderamen GBKP. BP Klasis si reh ngendesken Vikarista enda eme Ketua Klasis : Pdt. Dormanis Pandia, Bendahara Klasis : Dk. Perwira Ginting ras Anggota BP Klasis : Pdt. Elba Pranata Barus. Acara enda pe ihadiri Pt/Dk ras Nora-Naras GBKP Runggun Kutakepar bagepe Keluarga Vic. Pagit Isaura br Tarigan. Jumlah kerina sipulung ibas acara enda lit + 35 kalak

Acara pengendesen ibenaken alu Renungan Kata Dibata sini ibabai Pdt. Elba Pranata Barus. Kata Dibata sini isehken Pendeta Runggun Ergaji enda ibuat ibas Jeremia 1:4-10, janah arah Kata Dibata enda gelahna Vikaris bagepe perpulungen nggejapken maka penempatan PKPW ku runggun enda eme rencana Dibata simehulina man PKPW si itempatken bagepe kerina ngawan Perpulungen si lit i Runggun Kutakepar enda, emaka perlu sidalani alu tutus ras tetap erkemalangen man Tuhan. Emaka ilanjutken me acara Pengendesen e alu nehken kata sambutan ibas Runggun Kutakepar, janah ilanjutken kata pengendesen sini isehken BP Klasis Kabanjahe-Tigapanah sini iwakili Pdt. Dormanis Pandia man BP Runggun Kutakepar. Ibas nehken katana, BP Klasis erpesan gelahna Vikaris si itempatken ibas Runggun enda ndahiken kerina tanggung jawab pelayanan alu tutus ras mehuli, janah gelahna Perpulunngen pe bertanggung jawab mereken hak ras menjamin kesejahteraan PKPW si itempatken enda. Ibas acara enda pe ilakoken acara erban sangkep nggeluh nandangi Vic. Pagit br Tarigan guna jadi orangtuana sini iarapken banci mendukung pelayanan i tengah-tengah GBKP Runggun Kutakepar enda.

Ibas tgl. 27 Agustus 2014 si lewat pe i tengah-tengah Klasis Kabanjahe-Tigapanah ilakoken Acara Lepas Sambut PKPW si melayani i GBKP Runggun Mularayat. PKPW si ilepas eme Pdt. Meribeti br Sembiring ku GBKP Runggun Ergaji, janah PKPW si itempatken entahpe isambut eme Vic. Junika br Gurusinga. Acara enda ilakoken ibas wari Rabu berngi i Rumah Personalia GBKP Mularayat. Acara Lepas Sambut enda ibenaken alu man berngi si enggo isikapken Perua/Diaken ras Nora-Naras.

Kenca dung man berngi ilanjutken melasken kata guna mpetandaken diri ibas keluarga Vicaris si mbaru reh ku Mularayat eme Vic. Junika br Gurusinga rikut ras kerina keluarga si ikut naruhken Vicaris enda. Emaka ilanjutken kata Perpisahan ibas keluarga Pdt. Meribeti br Sembiring. Emaka melasken kata ibas Vicaris simbaru reh. Kenca si e, ilanjutkan kata sambuten ras kata pelepasan ras kata pengalo-ngalo si isehken BP Runggun GBKP Mularayat ras Ketua Perpulungen Merek si jadi bagian perpulungen GBKP Mularayat enda. Ibas nehken kata, Runggun Mularayat ras Perp. Merek ngataken melala bujur nandangi pendeta si enggo pindah ibas Runggun e nari, janah mengapresiasi pelayanan si enggo isehken Pdt. Meribeti br Sembiring selama melayani i GBKP Runggun Mularayat. Ibas kesempaten e, BP Runggun mereken gambaren kerna sejarah ras medan pelayanan si lit ibas Runggun Mularayat bagepe Perpulungen Merek man Vicaris simbaru itempatken e.

Emaka acara ilanjutken pengendesen Vicaris sini ilakoken BP Klasis Kabanjahe-Tigapanah sekaligus mewakili Moderamen GBKP. BP Klasis si hadir ibas paksa si e eme Pdt. Dormanis Pandia ras Pdt. Elba Pranata Barus. Ibas nehken kata BP Klasis pe erpesan gelahna Vic. Junika br Gurusinga ndahiken kerina tanggung jawab pelayanan alu tutus ras mehuli terlebih medan pelayanan yang cukup luas ras enterem enda, janah gelahna Perpulunngen pe bertanggung jawab mereken hak ras menjamin kesejahteraan PKPW si itempatken ibas Runggun Mularayat enda. Acara enda pe iisi alu peresmian si jadi orangtua  bagepe sangkep nggeluh Vicaris enda i kuta Mularayat enda, gelah enda pe iarapken banci mendukung pelayanan Vic. Junika br Gurusinga i tengah-tengah Runggun Mularayat enda. Acara enda itutup alu pertoton sini ibabai Pdt. Elba Pranata Barus bagepe sisalam-salamen ras nehken kata selamat melayani ibas ingan si mbaru man Pdt. Meribeti Sembiring bagepe selamat datang man Vicaris Junika br Gurusinga. (Vic. Yohan Frananta Tarigan).